هادا واش نشفا بكري كي كنت صغير

سي فري نشفا بكري خلاه
كي كنت صغير كي كان وقت النية
كان وقت الخير
1993 خرجت من كرش يما
جاوا الطبة حصروني وقصولي السرة
نشفا القابلة شحال لطفتني
جبدتلي ليكوش رقدتني وقمطتني
وغمضتلي عينيا زعما باه نتكالما
و علاه عليك ديجا تسع شهر و أنا في الظلمة
ست سنين من بعد حطوني في الكلاسا
عطاونيكارتايل ممحاة وأردوازا
قالولي هنا في الصف الأول لازم تقعد
باه تهدر مع سيدتي لازم ترفع صبعك
وبديت في الابتدائي قريت السنة الأولى
المعلمة هيجناها نعيطولها يا المهبولة
بورتون كانت عاقلة جامي غضبانة
هي اللي علمتنا نغنيوا مع بعضانا :
أغسل أسناني بالفرشاة
أمسح وجهي بالممسحة
أمي تعطيلي محفظتي
أذهب وحدي إلى المدرسة
أنا كي كنت صغير ماكانش بلايستايشن
ماكانش النت
نخرجو من القرايا نجريوا في الطريق
نشغلو لا تيلي ورا القرآن نشوفو لي كوميك
نلعبو صايي نتخباو ندرقو
في العيد الكبير نشوفو الكباش كيفاش يتعاركو
نحبو الراقادا اللي عندو دورة ونص
مالغري اللحم نتاعو عاصي وبسيف يتقص
كنا نلعبو الفوت من كارتي لكارتي ندورو
تحك خمسميات فرنك اللي يربح يدي ألف فرنك
ساعة على ساعة نتعاركو
بصح نقولك الحق في قلوبنا ماكانش البغض و ماكانش الحقد
ومن بعد ورا السيزيام دخلنا للسييام
لتما سي سور ولا يجوز علينا الصيام
ولينا كبار زعما و وحدة وحدة بدينا ننساوالغنايا هاديا:
أغسل أسناني بالفرشاة
أمسح وجهي بالممسحة
أمي تعطيلي محفظتي
أذهب وحدي إلى المدرسة
ومن بعد طلعنا لليسي
لتما جات الخلطة وبدات الدعوة تفسد
و العقلية تولي خردة
قليل فينا اللي بقاو بنفس العقلية
أنا كان عندي الزهر للباك وصلت
وبربي نشا الله لجامعة نعدي
وسي سور كاين اللي يعدي معاياوكاين اللي راح يقاري في نفس الطريق
المهم عقبنا مع بعضانا وقت علكيف
هاديا الدنيا كيما هاكا قاعدا تدور
تتعجب هايا بكري أشكون اللي كان يقول
كنا صغار ورباونا والدينا
و دركا قريب تجي دالتنا باه نربيوا ولادنا اللي بين يدينا
لي سونسيال حاب نقول في هاد الموضوع
كل واحد منا حياتو راهي حكاية
الوقت اللي تعيشو أشبع منو خاطاك
على قد ما نتا تكبر لي بروبلاميكبرو معاك
و لاكان ضاقت بيك وشفت الدنيا صعابت
أتفكر روحك كي كنت تغني مع صحابك
أغسل أسناني بالفرشاة
أمسح وجهي بالممسحة
أمي تعطيلي محفظتي
أذهب وحدي إلى المدرسة

هههههههه ان شا الله يعجبكم الموضوع هادا

لكم فائق ودي وحبي واحترامي يا اخوتي